Böcker av Xasan Cabdi Madar

Khudbaddii sagootiska ee nabiga (NNKHA) iyo siraha, murtida iyo xikmadda lagala bixi karo ee nolosha adduunyo iyo aakhiroba lagu maarayn karo ayaa buuggan "Dige" ka hadlayaa. Waxa aynu ka baran karno iyo mabaadiida aasaasiga ah ee dunida maantu si dadban iyo si toos ahba uga baratay ayaa buuggu xoogga saarayaa.Buuggu si kooban ayuu khudbadda uga soo xulanayaa 21 mabda' oo caalami ah oo nolosha adduunyo ee aadamaha wax weyn lagaga beddeli karo. Mabaad'iidan badankoodu waa kuwo dunida islaamka iyo ta dadka aan islaamka ahaynba maanta ka dhex jira aanse aad loo dareensanayn sida wax looga baran karo iyo heerka isbeddel ee nolosheenna ay ku yeelan karaan haddii si dhab ah loo fahmo.

Dhigaal, waa buug murti iyo Maanso ah. Waxa ku jira maansooyin badan oo casri ah oo ka hadlaya qaybaha kala duwan ee nolosha.

NOOLAYS waa buug inagu baraarujinaya in adduunyada tahay halka aakhiro looga shaqaysto oo lagu qabto gacanta, aakhirona lagu qabto qalbiga. Waxa sidoo kale buuggu ina barayaa ama inna xasuusinayaa in aadamuhu guud ahaan u siman yahay cilmiga, tiknoolajiga, horumarka iyo gacan ku haynta awoodda dunida. Waxa buuggu inna xasuusinayaa in muslinka xoogga lihi ka wanaagsan yahay muslinka awoodda daran iyo in gacanta sare ka wanaagsan tahay gacanta hoose.Waxa buuggu cuskanayaa aayado Quraan ah, axaadiis, iyo sheekooyin tusaale ah oo ay tahay in si aad ah loogu adeegsado wacdiga iyo waxsheegga si qofka muslinka ah loo tuso awoodihiisa qarsoon iyo inuu tusaale dhaqan wanaag lagaga daydo u noqdo aadamaha dunida ku nool oo dhan iyo in binu'aadamku ay tahay inuu ku wada noolaado nabad iyo isxushmayn. Waxa uu innagu boorrinayaa in qofka muslinka ahi aanu horumarka, cilmiga iyo awoodda marti uga noqon aadame kale balse in isaga marti looga noqdo mar haddii uu aadamaha kale dheer yahay nimcada islaamka ee Ilaahay ku galladaystay.